Violenza en la vegliadetgna
La cussegliaziun da l'agid a victimas è qua per tut ils umans ch'èn vegnids nuschids en Svizra fisicamain, psichicamain u sexualmain sin fundament d'in delict. I na gioga nagina rolla tge schlattaina u vegliadetgna u tge orientaziun sexuala u religiun che Vus avais. La cussegliaziun da l'agid a victimas è gratuita. Ella è confidenziala e sin giavisch er anonima.
En Svizra èn mintg'onn passa 300'000 senioras e seniors sur 60 onns pertutgads da violenza. Mo darar fan las persunas pertutgadas u lur confamigliars diever da las purschidas d'agid existentas. Ils motivs èn fitg differents, tranter auter: turpetg, nunenconuschientscha da las pussaivladads d'agid, dependenza d'auters umans (p.ex. confamigliars, persunal da tgira, assistenza), problems da la sanadad u tema da las consequenzas. Violenza po vegnir pratitgada a moda conscienta u inconscienta e cumpiglia differents aspects:
- violenza fisica (survegnir fridas, vegnir rentà, vegnir arsentà, etc.)
- violenza psichica (vegnir umilià, survegnir smanatschas, vegnir isolà, etc.)
- violenza sexuala (vegnir violà, vegnir mulestà sexualmain, etc.)
- violenza finanziala (vegnir privà da daners, vegnir sfurzà da dar giu daners, vegnir explotà finanzialmain, etc.)
Da violenza pon tuttas e tuts esser pertutgads. Far fin cun la violenza è la responsabladad da l'entira societad. Essas Vus ubain confamigliar:as, vischin:as, pazient:as u collegas da Vus pertutgad:as da violenza? U avais Vus observà ina situaziun difficila? Reagi ussa!
Qua chattais Vus tut ils posts da cussegliaziun da l'agid a victimas
Campagnas «Ensemen cunter violenza en la vegliadetgna»
La Conferenza da las directuras e dals directurs chantunals dals affars socials CDAS ha lantschà mez favrer 2024 ina campagna online per far enconuschent l'agid a victimas cun focus sin umans pli vegls. L'Uffizi federal per l'egualitad tranter dunna ed um sustegna finanzialmain la campagna.
La campagna è la cuntinuaziun e cumplettaziun da campagnas precedentas ch'èn vegnidas elavuradas sut il titel «Ensemen cunter violenza en la vegliadetgna». La primavaira 2023 ha la Prevenziun svizra da la criminalitad (PSC) realisà ensemen cun l'Agid a victimas Svizra ed il Center da cumpetenza naziunal Vegliadetgna senza violenza ina campagna per encuraschar persunas pertutgadas e lur confamigliars da discurrer davart il tema e dad ir per agid. Plinavant han l'Institut et Haute Ecole de la Santé La Source (HES-SO), il senior-lab ed il Center da cumpetenza naziunal Vegliadetgna sena violenza lantschà il november 2023 ina campagna en connex cun violenza en relaziuns da pèrs pli vegls.